“အိမ်ထောင်သည်လား ကလေးမရှိဘူးလား သူတို့ကို အတုယူရမယ်လေ”
ညစာထမင်းဟင်းပွဲတွေမှာပြီးထိုင်နေတုန်း ကျွန်မသူငယ်ချင်းလင်မယားရဲ့အသိစားဖိုမှူးက ကျွန်မတို့စားပွဲကို နှုတ်လာဆက်ရင်းပြောလိုက်တဲ့စကားတစ်ခွန်းပါပဲ စားဖိုမှူးရဲ့အပြောကို မသိလိုက်မသိဘာသာနားထောင်ရင်း ကျွန်မမျက်နှာချင်းဆိုင်စားပွဲတစ်ဖက်ခြမ်းမှာထိုင်နေတဲ့ နေ့စေ့လစေ့ကိုယ်ဝန်သည်ဇနီးသည်သူငယ်ချင်းကိုသာ မချိပြုံးပြုံးရင်း ကျွန်မလှမ်းကြည့်မိပါတယ် တော်ရုံတန်ရုံ အခုမှတွေ့တဲ့၊ အထူးသဖြင့် နောက်နောင်လည်း ထပ်တွေ့ဖြစ်ချင်မှတွေ့မဲ့လူတွေနဲ့ ကျွန်မအမြင်အတွေးတွေကို အချေအတင်စကားငြင်းခုံပြောဆိုဖို့စိတ်ဆန္ဒကလည်းမရှိတာတစ်ကြောင်း (ငြင်းခုံတာသာအဖတ်တင်ပြီး တကယ်တမ်းပြဿနာတစ်ခုရဲ့အခြေအမြစ်ကို သေသေချာချာဆွေးနွေးဖလှယ်ဖြစ်ကြမှာလည်းမဟုတ်ဘူးဆိုရင်တော့ များသောအားဖြင့် ကျွန်မဘာမှသိပ်ပြောလေ့မရှိပါ မိန်းမတစ်ယောက်အနေနဲ့ ပေါင်းသင်းဆက်ဆံမွေးဖွားကြီးပြင်းလာခဲ့တဲ့သူတစ်ယောက်အနေနဲ့လည်း ယောင်္ကျားတွေလို ကိုယ်ထင်တာကို အချိန်မရွေး စဆရကလုပ်ပိုင်ခွင့်ရှိတယ်လို့ စိတ်ကအလိုလိုမခံစားရတာလည်းပါမယ်ထင်ပါတယ် အာကျယ်တဲ့မိန်းမတွေတို့၊ အခုခေတ်မှာ သရော်သလိုလိုပြောကြတဲ့ “ထက်မြက်တဲ့မမကြီး” တို့လိုစကားလုံးအခေါ်အဝေါ်တွေနဲ့ ကိုယ့်အမြင်ကိုထုတ်ဖော်ပြောတတ်တဲ့ မိန်းမ (သို့) မိန်းမလို့ယူဆမြင်ယောင်ခံရတဲ့သူတွေကိုကဲ့ရဲ့နေကြတာတွေရှိနေတုန်းမဟုတ်လား) ကျွန်မသူငယ်ချင်းကလည်း စားဖိုမှူးရဲ့ အလ္လာပသလ္လာပအနေနဲ့ပြောလိုက်တဲ့စကားအပေါ် ကျွန်မမနှစ်မြို့ဘူးဆိုတာရိပ်မိကောင်းရိပ်မိပါတယ် ဒါပေမဲ့ ကျွန်မတို့အားလုံးခပ်ပြုံးပြုံးနဲ့သာ သူ့အပြောကို ဘာမှပြန်မတုံ့ပြန်လိုက်မိပါ
တကယ်တော့ ဒီစားဖိုမှူးပြောလိုက်တဲ့ “ကလေးမယူသေးဘူးလား”/ “ကလေးရှိလား”/ “ကလေးဘယ်တော့ယူမှာလဲ” ဆိုတဲ့ ကလေးမွေးမြူခြင်းနဲ့ပတ်သတ်တဲ့စကားတွေဟာ ကျွန်မသက်လတ်ပိုင်းဝင်လာပြီးတောက်လျှောက် ခဏခဏကြားလာရတဲ့စကားတွေပါပဲ ကျွန်မဆောင်းပါးတွေအောက်မှာတောင် တစ်ခါတစ်ခါတွေ့ရတတ်တဲ့ “ယောင်္ကျားရမှသိမယ်” တို့၊ ဖီမီနင့်ဇင်နဲ့ ဂျန်ဒါအကြောင်းပြောတဲ့အခါတိုင်းမှာ ကျွန်မဟာ အလိုအလျောက် ယောင်္ကျားမုန်းသူကြီးလို့အထင်ခံရတာတို့ဟာ ခဏခဏကြုံလာရတဲ့ပြဿနာတွေဖြစ်တယ် အထက်ကပြောသလို ခဏတဖြုတ်သာကြုံရတဲ့သူတွေရဲ့ ဒီလိုသာမန်ကာလျှံကာစကားတွေကို ပြန်ချေပမနေချင်ပေမဲ့ ဘာကြောင့် ကျွန်မတို့ရဲ့လူ့ဘောင်ထဲမှာ သက်လတ်ပိုင်းရွယ်မိန်းမတစ်ယောက်ကိုမြင်တိုင်း “အိမ်ထောင်သည်လား”၊ “အပျိုကြီးလား”၊ အိမ်ထောင်သည်ဆို “ကလေးရှိလား”၊ “ဘာလို့ ကလေးမယူသေးတာလဲ” အစရှိတဲ့ reproductive labor လို့ခေါ်တဲ့ သားမွေးမြူရေးလုပ်အားတွေနဲ့သာ ချိတ်ဆက်ပြီး မေးခွန်းထုတ်ကြလေ့ရှိတာလဲ၊ အဲ့ဒီ့မေးခွန်းတွေဟာ မေးသင့်မေးထိုက်တဲ့မေးခွန်းတွေလို့လူတွေက ဘာလို့ထင်နေကြတာလဲဆိုတာကို ကျွန်မစဉ်းစားမိလာတယ်
သားမွေးမြူရေးလို့ခေါ်တဲ့ လူသားနောက်ထပ်မျိုးဆက်မွေးမြူရေးအလုပ်ကို ကျွန်မတို့လူ့အဖွဲ့အစည်းမှာ မိန်းမတွေရဲ့”သမိုင်းပေးတာဝန်”လို့သာ ဘာလို့မှတ်ယူလေ့ရှိကြတာလဲ?
သားမွေးမြူရေးအလုပ်ကို တစ်ဖက်မှာတော့ အင်မတန်မှအရေးကြီးတဲ့အလုပ်၊ လူသားမျိုးနွယ်အဓွန့်ရှည်ရေး၊ ရိုးရာဓလေ့ပြန့်ပွားရေးအတွက်လိုအပ်တဲ့အလုပ်တစ်ခုလို့မှတ်ယူကြပေမဲ့ တစ်ပြိုင်နက်တည်းမှာပဲ မိန်းမတစ်ယောက်ဟာ ကလေးတွေပဲတပြွတ်ပြွတ်မွေးနေမယ်ဆိုပြန်ရင်လည်း ဘာကြောင့်ကဲ့ရဲ့စောင်းမြောင်းရှုံ့ချခြင်းကိုခံနေကြရသေးတာလဲ? ဒီရှေ့နောက်မညီမှုက ဘယ်ကပေါက်ဖွားလာတာလဲ?
Evolutionary process လို့ခေါ်တဲ့ ဇီဝဗေဒဆင့်ကဲဖြစ်စဉ်တွေကိုလေ့လာတဲ့သုတေသီတွေအဖို့ သတ္တဝါတွေ၊ လူတွေအပါအဝင် အခြားသက်ရှိအကောင်ပလောင်တွေအကုန်လုံးဟာ ကျွန်မတို့ရဲ့ပင်ကိုဇီဝဗေဒအရ မျိုးပွားခြင်းအလုပ်ကိုလုပ်ကြတာဟာ သဘာဝပဲလို့ဆိုကြပါတယ် သတ္တဝါတစ်ကောင် ဒီကမ္ဘာကြီးပေါ်မှာ ဆက်လက်တည်ရှိနေဖို့ဆိုတာ သူသေသွားရင်တောင်မှ သူ့မျိုးဆက်တွေကျန်နေရစ်ခဲ့ဖို့ချန်ထားခဲ့ချင်စိတ်ဟာ DNA ထဲက တစ်စိတ်တစ်ပိုင်းလို့တောင်ခေါ်ကြမလားမပြောတတ်ပါဘူး ဒီဆင့်ကဲဖြစ်စဉ်ရှုထောင့်ကနေကြည့်တဲ့မျိုးဆက်ပွားခြင်းသဘောသဘာဝကို ယေဘုယျအားဖြင့်နားလည်ကြည့်လို့ရပေမဲ့ လူသားတွေအတွက် မျိုးဆက်ပွားခြင်းလိုကိစ္စမျိုးကို လူသားမျိုးနွယ် (သို့ မြန်မာလူမျိုးနွယ်၊ ကရင်လူမျိုးနွယ်၊ ချင်းလူမျိုးနွယ်အစရှိတဲ့ မိမိရဲ့လူမျိုးစု) မျိုးဆက်ပွားကျန်နေခဲ့စေချင်တာတစ်ခုတည်းရဲ့လှုံ့ဆော်မှုနဲ့ပဲကြည့်ဖို့ဆိုတာကတော့ ရိုးရာဓလေ့တွေရဲ့ပညတ်ချက်ဘောင်တွေအကြောင်းစိတ်ဝင်စားတဲ့သူတစ်ယောက်အနေနဲ့ ကျွန်မအလုံးစုံလက်သင့်မခံချင်ပါဘူးလေ လူတွေဟာ သူတို့သားစဉ်မြေးဆက်တွေကျန်နေခဲ့စေချင်တာတစ်ခုတည်းကြောင့် လိင်ဆက်ဆံကြတယ်၊ ကလေးမွေးကြတယ်ဆိုရင် ဘာလို့ မတူညီတဲ့ရိုးရာဓလေ့တွေမှာ ကလေးမွေးမြူခြင်းနဲ့ပတ်သက်ပြီး မတူညီတဲ့ပညတ်ချက်တွေရှိနေသေးတာလဲဆိုတာကို စိတ်ဝင်စားမိတယ် ပြီးတော့ ဆင့်ကဲဖြစ်စဉ်ထဲကလာတဲ့ အကြောက်တရားလို့ပဲဆိုမလား ကိုယ့်မျိုးဆက်တွေမကျန်ခဲ့တော့မှာကို စိုးရိမ်တဲ့အကြောက်တရားနဲ့တာဝန်ကို ဘာလို့ မိန်းမဂျန်ဒါတွေအပေါ်မှာပဲ မတန်တဆပေးအပ်ထားတာလဲဆိုတာကိုလည်း ကျွန်မစိတ်ဝင်စားမိတယ်
ဒါကတော့ သိပ်မကြာသေးခင်ကမှ မိုးသီးဇွန်ရေးတင်လိုက်တဲ့ သူ့ Facebook ပို့စ်တစ်ခုလိုပေါ့ ခုခေတ်လူငယ်တွေက ကလေးတွေလည်း သိပ်မမွေးကြတော့ဘူး၊ မိန်းမတွေကို ဘယ်သူတွေကယူမှာလဲဆိုတဲ့ပို့စ်တစ်ခု ပြန်ရှာမတွေ့တော့ပါဘူး ဖျက်လိုက်တာလား၊ ကျွန်မကိုပဲဘလော့လိုက်သလားမပြောတတ်ပါ ဒီမိုးသီးဇွန်ရဲ့ပို့စ်မှာဆိုရင် ဆင့်ကဲဖြစ်စဉ်သဘောတရားအရ နောက်မြန်မာမျိုးဆက်တွေမရှိတော့မှာကို ကြောက်သလိုလိုရေးထားပေမဲ့ (သူ့အနေနဲ့မြန်မာတွေကိုဆိုလိုတယ်လို့ ကျွန်မယူဆမိပါတယ် ပို့စ်ကိုလည်း မြန်မာလိုရေးထားတာဆိုတော့လေ) တကယ်တမ်းက မျိုးဆက်ပွားရေးတာဝန်ဟာ မိန်းမတွေမှာပဲရှိနေပြီး (သို့) မိန်းမတွေကသာလျှင် မျိုးဆက်ပွားကလေးမွေးရေးလုပ်နိူင်တာကြောင့် ဒီမိန်းမတွေကို မြန်မာယောင်္ကျားတွေက ခပ်ရိုင်းရိုင်းပြောရရင် impregnate ဗိုက်ကြီးအောင်လုပ်ပေးကြရမလိုလို လှုံ့ဆော်ထားတဲ့သဘောတွေပါနေတာကိုတွေ့ရတယ် ဒီတမင်ဖန်ဆင်းထားတဲ့ “ငါတို့နောက်မျိုးဆက်တွေမရှိတော့ဘူး” ဆိုတဲ့အကြောက်တရားဟာ ဘာလို့ ယောင်္ကျားတွေတော်တော်များများမှာရှိနေရတာပါလိမ့်
မိုးသီးဇွန်ပို့စ်ရဲ့ နောက်ကွယ်ကစိတ်ခံစားချက်နဲ့လှုံ့ဆော်ချက်ဟာ ၂၀၁၅ က မျိုးစောင့်ဥပဒေကိုတီထွင်ခဲ့တဲ့ အစွန်းရောက်ဘုန်းကြီးဝီရသူရဲ့ဝါဒနဲ့သိပ်မကွာလှပါဘူး ဝီရသူရဲ့အာဘော်အရဆိုရင် မြန်မာဗုဒ္ဓဘာသာယောင်္ကျားတွေဟာ ဘုန်းကြီးတွေဝတ်ကုန်ကြလို့ မြန်မာဗုဒ္ဓဘာသာမိန်းမတွေဟာ ဗုဒ္ဓဘာသာမဟုတ်တဲ့ယောင်္ကျားတွေကိုယူကြရရှာတယ်လို့ဆိုတယ် အဲ့လိုပဲ မိုးသီးဇွန်လိုမျိုး ယောင်္ကျားတချို့ကတော့ လက်ရှိစစ်အာဏာသိမ်းမှုကိုတော်လှန်ဖို့ ယောင်္ကျားတွေ တောထဲဝင်လက်နက်ကိုင်စစ်တိုက်နေကြရလို့၊ အဲ့လိုနဲ့သေကုန်ကြလို့ မြန်မာမိန်းမတွေခမျာ ယူစရာ၊ လိင်ဆက်ဆံပြီးကလေးမွေးစရာ ယောင်္ကျားတွေမကျန်ဖြစ်နေတယ်လို့ နောင်မျိုးဆက်ကိုအကြောင်းပြပြီး မိန်းမတွေရဲ့လိင်မှုကိစ္စ sex life ကို အကန့်သတ်ဖို့ကြိုးစားတယ်
ဒီနေရာမှာ ဝီရသူရော၊ မိုးသီးဇွန်ရော၊ တခြားသက်လတ်ပိုင်းမိန်းမတစ်ယောက်တွေ့တိုင်း အိမ်ထောင်သည်လား၊ ကလေးမယူသေးဘူးလားမေးတတ်ကြသူတိုင်းအနေနဲ့ မေ့မေ့ပျောက်ပျောက်ဖြစ်နေတဲ့ကိစ္စတစ်ခုက သားအိမ်နဲ့မွေးလာတဲ့လူတိုင်းရဲ့ လူမှုလုပ်ငန်းစဉ် (social function) ဟာ ကလေးမွေးတာတစ်ခုတည်းပဲမဟုတ်ဘူးဆိုတဲ့အချက်ပါပဲ မိန်းမတွေကို ဘယ်သူတွေယူကြမှာလဲလို့ မေးခွန်းထုတ်ခဲ့တဲ့မိုးသီးဇွန်အနေနဲ့ လိင်တူချင်းကြိုက်နှစ်သက်တဲ့၊ အိမ်ထောင်ပြုထားကောင်းထားနိူင်တဲ့မိန်းမတွေကို သူ့မျက်စိထဲမမြင်မိဘူး အဲ့လိုပဲ heterosexual လိင်ကွဲချင်းကြိုက်နှစ်သက်ပြီးပေါင်းသင်းနေတဲ့ အိမ်ထောင်တစ်ခုမှာတောင် သားအိမ်ရှိနေတိုင်း၊ မိန်းမတစ်ယောက်ဖြစ်နေတိုင်း သားမွေးနိူင်တာမဟုတ်ဘူးဆိုတာကိုတော့ ဒီယောင်္ကျားကြီးတွေက မေ့ဖျောက်ထားကြတယ်
ပြီးခဲ့တဲ့နှစ်ထဲမှာ ကျွန်မဟာ PCOS လို့ခေါ်တဲ့ polycystic ovarian syndrome ရောဂါရှိနေတာကိုသိခဲ့ရတယ် ဒါကတော့ သားဥအိမ်ကနေ ပုံမှန်လစဉ်ထုတ်လုပ်တဲ့သားဥတွေဟာ သားအိမ်ထဲအထိ မကြွေကျဘဲ သားဥအိမ်မှာပဲတစ်နေတဲ့ပြဿနာပေါ့ သားဥတွေက သားအိမ်ထဲမကြွေတဲ့အတွက် လစဉ်ရာသီလာတာက ပုံမမှန်ဖြစ်တတ်တာရယ်၊ ယောင်္ကျားဟော်မုန်းလို့ခေါ်တဲ့ တက်စရော်စတရုန်း (testosterone) တွေ သာမန်ထက်ပိုများနေတာရယ်ကလွဲရင် PCOS ဟာ မိန်းမတွေအတွက် ကလေးမရခြင်းရဲ့အဓိကပင်မအကြောင်းရင်းဖြစ်တယ်ဆိုတာကို ကျွန်မလေ့လာခဲ့ရတယ် (လူတိုင်းမှာ တက်စရော်စတရုန်းရော၊ ‘မ’ဟော်မုန်းလို့ခေါ်ကြတဲ့ အက်စရိုဂျင် (estrogen) နှစ်မျိုးလုံးတွဲရှိနေတတ်ကြတာပါပဲ အနည်းနဲ့အများသာကွာပါတယ် ဒီလိုဇီဝဗေဒအရရှိနေတဲ့ဟော်မုန်းတွေ၊ ခန္ဓာကိုယ်အစိတ်အပိုင်းတွေ ဥပမာ – ရင်သားတို့ကို ဘယ်ဟာကတော့ ဖို၊ ဘယ်ဟာကတော့ မ အစရှိသဖြင့်ဂျန်ဒါပြုလိုက်ကြတာတွေကလည်း သေချာစဉ်းစားကြည့်ရင် မေးခွန်းထုတ်စရာတွေပါပဲ ခန္ဓာကိုယ်ဝဖြိုးလို့ ရင်သားစူနေတဲ့ယောင်္ကျားတွေရဲ့ရင်သားတွေဟာ လိင်စိတ်အမြင်နဲ့ကြည့်ရှုမခံရသလို ဘော်လီဝတ်ဖို့လည်း ဘယ်သူကမှ သူတို့ကိုမတိုက်တွန်းပေမဲ့ ရင်သားမရှိတဲ့ ပါးပါးလျလျမိန်းမတစ်ယောက်ကိုတော့ ဘော်လီမပါဘဲ အိမ်ပြင်မထွက်သင့်ဘူးလို့ဆိုကြတာ ဘာကြောင့်လဲ? အများအလယ်မှာ ကလေးနို့တိုက်မဲ့မိခင်ကိုတောင်မှ သူတို့ရင်သားကို လိင်စိတ်အမြင်နဲ့ကြည့်ခံရမှာစိုးလို့ ပဝါခြုံခိုင်းတာ ဘာသဘောလဲ?)
ကလေးသန္ဓေတည်ဖို့ဆိုတာ သားအိမ်ထဲမှာ သားဥက သုတ်ကောင်နဲ့ပေါင်းစပ်မှသာလျှင်ဖြစ်နိူင်တာကိုး တစ်ချိန်တည်းမှာပဲ PCOS ဟာ ရှားပါးလှတဲ့ရောဂါတစ်ခုမဟုတ်ဘဲ AFAB (assigned female at birth) လို့ခေါ်တဲ့ မွေးကတည်းက ကမ္ဘာ့လူဦးရေထဲက မိန်းမလို့သတ်မှတ်ခံလိုက်ရတဲ့လူ (ဒါက သားအိမ်နဲ့မွေးလာရင်၊ vulva နဲ့မွေးလာရင် တချို့ vulva ပါပေမဲ့ သားအိမ်မပါရင်တောင်မှ မိန်းမလို့သတ်မှတ်ခံလိုက်ရတာကိုဆိုလိုတာပါ) ၁၅ ရာခိုင်နှုန်း (၁၅ မီလီလျံ) မှာဖြစ်နေတဲ့ရောဂါတစ်ခုလို့သိခဲ့ရတယ် တစ်ပြိုင်နက်တည်းမှာပဲ စိတ်ဝင်စားဖို့ကောင်းတာက ဒီလောက်အဖြစ်များတဲ့၊ AFAB တွေတော်တော်များများမှာကြုံနေရတဲ့ PCOS ရောဂါကိုပျောက်အောင်ကုသဖို့ဆေးဆိုတာ ခုထက်ထိမရှိသေးသလို၊ ပျောက်ဆေးရှာဖို့ သုတေသနတွေကိုလည်း အစိုးရတွေက အလုံအလောက်ပိုက်ဆံမပံ့ပိုးပေးကြဘူးဆိုတဲ့အချက်ပါပဲ အောက်မှာ PCOS အကြောင်း လင့်ခ်တွေထည့်ပေးထားပါတယ်
PCOS ဟာ သေစေလောက်အောင် အန္တရာယ်ရှိတဲ့ရောဂါတစ်ခုတော့မဟုတ်ပေမဲ့ diagnose လုပ်ခံလိုက်ရပြီးပြီဆိုရင်လည်း တစ်သက်လုံး ဒီ diagnosis နဲ့ပဲနေသွားရမဲ့ရောဂါတစ်မျိုးပဲ ကလေးယူဖို့စိတ်ဆန္ဒမရှိတဲ့မိန်းမတစ်ယောက်အနေနဲ့ ကျွန်မအတွက်က ဟော်မုန်းအတက်အကျထိန်းဖို့ကလွဲလို့ PCOS ဟာ ကျွန်မရဲ့နေ့စဉ်ဘဝကို ထွေထွေထူးထူးတော့ သိပ်မထိခိုက်လှပါဘူး ဒါပေမဲ့ ဒီနေရာမှာ သက်လတ်ရွယ်မိန်းမတစ်ယောက်ကို အပေါ်ယံမြင်တိုင်း ကလေးမယူသေးဘူးလား၊ ကလေးမရှိဘူးလားမေးတတ်ကြတဲ့သူတွေအဖို့၊ မိုးသီးဇွန်တို့လို မိန်းမတွေကို ဘယ်သူတွေကယူပြီး မျိုးဆက်ပွားပေးမှာလဲဆိုတဲ့အဆိုတွေကို လက်လွယ်စပယ်ပြောတတ်တဲ့သူတွေအဖို့ လူတိုင်းမှာ မျက်စိနဲ့အလွယ်မမြင်ရနေတဲ့အရာတွေရှိနေတယ်ဆိုတာကို မေ့နေကြတာရယ်၊ ဒီလောက်တောင်မှ မိန်းမတွေကလေးမွေးရေး၊ နိူင်ငံတော်ရဲ့နောက်မျိုးဆက်တွေတည်ရှိရေးဟာဆိုရင်ပဲ မိန်းမတွေရဲ့အလုပ်လိုလို (ဟို ဘာလဲ ပုခက်လွှဲသောလက်သည် ကမ္ဘာကိုလွှမ်းနိူင်သည်ဆိုသလိုနဲ့ တစ်ဖက်လှည့်နဲ့ မိန်းမတွေမှာအသုံးဝင်တာဆိုလို့ သူတို့ရဲ့သားအိမ်တွေပဲရှိတယ်လို့ စာတစ်တန်ပေတစ်တန်ပြောဆိုရေးသားနေကြတဲ့ ဖြိုးသီဟတို့လို ခုခေတ်ယောင်္ကျားတက်ကျမ်းပညာရှင်ကြီးများဟာ မိန်းမတွေ ကလေးမရနိူင်ခြင်းရဲ့ကြီးမားလှတဲ့အကြောင်းရင်းတစ်ခုဖြစ်တဲ့ PCOS ရောဂါပပျောက်ရေးအတွက် ကုထုံးဆေးသုတေသနတွေကိုကျ အားမပေးမထောက်ပံ့မပြောဆိုကြတာလဲဆိုတာ အင်မတန်မှစိတ်ဝင်စားစရာပါပဲ (အောက်မှာ လင့်ခ်ထည့်ပေးထားတဲ့ ဖြိုးသီဟရဲ့ဆောင်းပါးထဲမှာဆိုရင်လည်း “မိခင်”တွေဟာ နိူင်ငံတော်တည်ထောင်ရေးအတွက် နောင်မျိုးဆက်သစ်တွေမွေးမြူရေးအတွက် အရေးပါသူတွေဖြစ်လို့ ပညာတတ်မိခင်တွေလိုတယ်လို့ ဂျင်းကျွေးထားတာကို တွေ့ရပါတယ် တကယ်တမ်း မိခင်တွေသာ ပညာတတ်လာရင် ဒီဂျင်းတွေကိုစားတော့မှာတောင်မဟုတ်ပါ (ဒီနေရာမှာ ကျွန်မဆိုလိုချင်တဲ့ ပညာတတ်ဆိုတာ အတန်းပညာ ဘွဲ့ဒီဂရီမဟုတ်ဘဲ စဉ်းစားတွေးခေါ်နိူင်စွမ်းနဲ့ မေးခွန်းပြန်ထုတ်နိူင်စွမ်းတွေကို ဆိုလိုတာပါ ဖြိုးသီဟကတော့ ဘယ်လိုမျိုးကို ပညာတတ်လို့ဆိုလိုချင်သလဲမသိပါ)
စကားချပ်ခံချင်တာကလည်း အကြောင်းအမျိုးမျိုးကြောင့်ကလေးယူချင်သူတွေက ယူလို့ရပါတယ် ဘယ်သူ့ကိုမှ ကလေးမမွေးရဘူးလို့ ကျွန်မအမိန့်ပေးနေတာမဟုတ်ပါဘူး ပတ်ဝန်းကျင်ဖိအားတွေနဲ့ ဖြစ်ရိုးဖြစ်စဉ်တွေကြောင့်ဆိုတာထက် ဘာကြောင့် ကလေးယူရ/တာလဲဆိုတာ ကိုယ့်ဘာသာကိုယ်သဘောပေါက်ကြရင်ပြီးတာပါပဲ
ကလေးမွေးမြူရေး၊ ပြုစုစောင့်ရှောက်ရေးဟာ မိန်းမတွေရဲ့အလုပ်လို့သာမြင်ယောင်သတ်မှတ်ထားတဲ့ပြဿနာကိုထောက်ပြပြီးတော့ ဒီလို တမင်တကာဖန်ဆင်းထားတဲ့ “ငါတို့နောက်မျိုးဆက်သစ်တွေမရှိတော့ဘူး” ဆိုတဲ့အကြောက်တရားဟာ အရင်းရှင်စနစ်နဲ့လုပ်အားလည်ပတ်ရေးနဲ့အများကြီးချိတ်ဆက်နေတယ်ဆိုတာကိုလည်း ကျွန်မဆင်ခြင်မိတယ် သားမွေးရေးဟာ နဂိုကနဦးမှာတော့ survival instinct လို့ခေါ်တဲ့ကျွန်မတို့လူသားမျိုးနွယ်ဆက်လက်တည်ရှိရေးကနေလှုံ့ဆော်လိုက်လို့လုပ်ကြတဲ့ သဘာဝဖြစ်စဉ်တစ်ခုလို့ယူဆကောင်းယူဆလို့ရပေမဲ့ အခုလိုကမ္ဘာ့အရင်းရှင်ခေတ်မှာ ဘယ်သူကမှ နောက်ထပ်မျိုးဆက်ကျန်ရစ်အောင် ကလေးမွေးကြတာမဟုတ်တော့ပါဘူး တကယ်လို့ အဲ့ဒါကြောင့် ကလေးမွေးကြတာဆိုရင်တောင်မှ အဲ့ဒီအကြောင်းရင်းဟာ ကျွန်မတို့ကို အပေါ်ယံလှည့်စားထားတဲ့အကြောင်းရင်းတစ်ခုသာဖြစ်တယ်
တစ်လောကကျွန်မသတင်းတစ်ခုဖတ်လိုက်ရတယ် ကနေဒါနိူင်ငံလူဦးရေဟာ ကျဆင်းလာနေပြီး ရှေ့လျှောက်မှာ ဒီနှုန်းအတိုင်းဆက်သွားရင် ကနေဒါနိူင်ငံရဲ့အလုပ်သမားအင်အားစု (worker force) ကျဆင်းလာနိူင်ခြေရှိနေတယ်တဲ့ ဒီနေရာမှာ ကျွန်မတို့မြန်မာနိူင်ငံလို အရှေ့တိုင်းနိူင်ငံတွေက အိမ်ထောင်သားမွေးရေးကို ရိုးရာတွေ၊ ဓလေ့တွေ၊ ဘာသာရေးတွေနဲ့ချိတ်ဆက်လေ့ရှိပေမဲ့ atheist ဘာသာမဲ့လို့ ကိုယ့်ကိုယ်ကိုခံယူကြတဲ့အနောက်နိူင်ငံတွေကတော့ သားမွေးမှုကို အလုပ်သမားအင်အားစုနဲ့ တိုက်ရိုက်အချိုးချပြောဆိုကြတယ် (တကယ်တမ်းကတော့ ဘာသာရေးက အဲ့လောက်မဲ့နေတာမဟုတ်ပါဘူး အမေရိကန်ဆိုရင်လည်း မြန်မာနိူင်ငံက ဗုဒ္ဓဘာသာကြီးစိုးမှုနည်းတူ God ဆိုတာကို နေရာတိုင်းမှာတွေ့နေရတာပါပဲ Trump နဲ့ republican တွေရဲ့နိူင်ငံရေးကမ်ပိန်းတွေမှာကိုက God bless America ဆိုတဲ့ဆောင်ပုဒ်ကို နေရာတိုင်းမှာမြင်နေကြားနေရတာဟာ အမေရိကန်သည်လည်း ဘယ်လောက်ပင် နိူင်ငံရေးနဲ့ဘာသာရေးခွဲထားသည်ပြောပြော မြန်မာပြည်နိူင်ငံရေးကို ဗုဒ္ဓဘာသာလွှမ်းမိုးထားသလို ခရစ်ယာန်ဘာသာရေးက အမေရိကန်နိူင်ငံရေးအပေါ် အများကြီးယှက်နွှယ်နေသေးတယ်ဆိုတာပြနေတာပါပဲ)
အဲ့တော့ မေးခွန်းထုတ်စရာ ကျွန်မတို့ရဲ့လူသားဖြစ်တည်မှုဟာ အလုပ်သမားဖြစ်တည်မှုညီမျှခြင်းရဲ့တစ်ဖက်ခြမ်းမှာပဲရှိနေတာလား?
လူဖြစ်ဖို့ဆိုတာ အလုပ်လုပ်ဖို့လား? အလုပ်လုပ်ခြင်းသည် လူဖြစ်တာလား?
လူဖြစ်တာဟာ၊ လူမွေးတာဟာ လုပ်အားထုတ်လုပ်ဖို့လို့ ချက်ချင်းမြင်ယောင်လိုက်တာဟာ အရင်းရှင်စနစ်ကနေလာတဲ့အတွေးအခေါ်ယူဆချက်တစ်ခုပဲ ထုတ်လုပ်မှုတစ်ခုခုမှမရှိတော့တဲ့လူသားတစ်ယောက်ဟာ အဲ့ဒီနိူင်ငံ၊ အဲ့ဒီ economy အတွက်အသုံးမဝင်ဘူး၊ statistics ထဲမှာတောင် ထည့်တွက်လို့မရတဲ့ ဆန်ကုန်မြေလေးတစ်ယောက်ပေပဲလား?
ဆင့်ကဲထပ်မေးခွန်းထုတ်ရရင် မိန်းမဖြစ်ခြင်းသည် သားမွေးရုံသက်သက်လား? မိန်းမသည် သားအိမ်လား? သားအိမ်သည် မိန်းမလား? (Trans မိန်းမတွေကို မိန်းမလို့လက်မခံတဲ့သူတွေကတော့ အင်း လို့ဖြေကြမလားမသိပါဘူး)
ဒီနေရာမှာလည်း ဒီကနေဒါနိူင်ငံလူဦးရေကျဆင်းမှုနဲ့ လုပ်အားလျော့နည်းလာမှုသတင်းရဲ့အောက်ခြေမှာ ကနေဒါတို့၊ အမေရိကန်တို့လို အနောက်နိူင်ငံတွေရဲ့ economy ကို လှည့်ပတ်အောင် လုပ်ပေးနေတဲ့ ရွှေ့ပြောင်းအခြေချသူတွေရဲ့လုပ်အားဟာလည်း ဖျောက်ဖျက်ခံထားနေရသေးတယ်ဆိုတဲ့အချက်ကိုပါ ဆက်စပ်မြင်လာနိူင်တယ် ကနေဒါလူဦးရေကျဆင်းလာမယ်လို့ဆိုတာဟာ ကနေဒါ”နိူင်ငံတော်”ရဲ့မျက်လုံးထဲမှာ “တရားဝင်နိူင်ငံသား” လို့သာမြင်တဲ့သူတွေကိုသာ ရေတွက်နေလို့ပဲဖြစ်တယ် တကယ်တမ်းက ကနေဒါရဲ့လူနေထူထပ်တဲ့မြို့ကြီးတွေမှာ အောက်ခြေလုပ်အားကိုထုတ်လုပ်နေကြသူတွေဟာ အာရှနဲ့ တောင်အမေရိကတိုက်ကလူညိုတွေသာဖြစ်တယ် ဒီလူညိုတွေရဲ့ သားမွေးမြူမှုလုပ်အားတန်ဖိုးဟာ လူဖြူတွေရဲ့သားမွေးမြူမှုလုပ်အားတန်ဖိုးဟာ ထပ်တူမညီလို့ လူဖြူလူဦးရေကျဆင်းလာမှုကသာလျှင် အင်မတန်စိုးရိမ်စရာသတင်းဖြစ်လာတာလား? မေးခွန်းတွေပဲ ကျွန်မထုတ်လိုက်ပါမယ်
ဒီနေရာမှာ လူမည်းဖီမီနင့်တွေးခေါ်ပညာရှင်နဲ့ပါမောက္ခ Joy James (ဂျွိုင်းဂျိမ်းစ်) ရဲ့ အရင်းရှင်စနစ်သာမက အနောက်ဒီမိုကရေစီလည်ပတ်မှုနဲ့ပါချိတ်ဆက်ပြီး မိန်းမတွေရဲ့သားမွေးမြူမှုနဲ့မိခင်ဖြစ်မှုသီအိုရီနဲ့ပါ ကျွန်မချိတ်ဆက်စဉ်းစားမိတယ် Joy James က ဒါကို captive maternal (ဖမ်းဆီးထိန်းချုပ်ခံထားရသော မိခင်ဖြစ်တည်မှု) လို့ သီအိုရီထုတ်ထားတယ် ၂၀၁၆ ခုနှစ်မှာထုတ်ဝေခဲ့တဲ့ James ရဲ့ The Womb of Western Theory: Trauma, Time theft, and the Captive Maternal (အနောက်သီအိုရီ၏သားအိမ် – ထရော်မာ၊ အချိန်ခိုးခြင်းနှင့် ဖမ်းဆီးထိန်းချုပ်ခံထားရသောမိခင်ဖြစ်တည်မှု) စာတမ်းထဲမှာ captive maternal ကို James က ဒီလိုအဓိပ္ပါယ်ဖွင့်ထားတယ် (စာတမ်း pdf အောက်မှာထည့်ပေးထားပါတယ်)
“Captive Maternals can be either biological females or those feminized into caretaking and consumption.”
“ဖမ်းဆီးထိန်းချုပ်ခံထားရသော မိခင်ဖြစ်တည်မှုများဆိုသည်မှာ ဇီဝဗေဒအရမိန်းမဖြစ်တည်မှုကို ခေါ်ဆိုခြင်းဖြစ်နိူင်သကဲ့သို့ ပြုစုစောင့်ရှောက်ရေးနှင့် စားသုံးခြင်းလုပ်ငန်းတို့အတွက် ‘မ’ပြုခံလိုက်ရသောသူများကိုလည်း ခေါ်ဆိုခြင်းဖြစ်သည်။”
ဆိုတော့ James ဆိုလိုတဲ့ captive maternal တွေဟာ မိမိမှာ ဇီဝဗေဒအရ သားအိမ်ပါနေလို့ အရင်းရှင်စနစ်လုပ်အားဆက်လက်လည်ပတ်စေရေးအတွက်သော်လည်းကောင်း၊ ရိုးရာဓလေ့အဓွန့်ရေးတည်တံ့ရေးဆိုတဲ့ခေါင်းစဉ်အောက်ကသော်လည်းကောင်း၊ အမျိုးသားရေးခေါင်းစဉ်အောက်ကသော်လည်းကောင်း သူတို့ရဲ့ လူမှုလုပ်ရပ်ကို အိမ်ထောင်သားမွေးခြင်းတစ်ခုတည်းနဲ့ တမင်တကာ ဖမ်းဆီးထိန်းချုပ်ခံလိုက်ရတဲ့မိန်းမတွေအပြင် အခြားသော မာ့စ်ဝါဒီမှာ social reprodutive labor လို့ခေါ်တဲ့ သားအိမ်တော့မရှိဘူး (သို့) ဇီဝဗေဒအရ သားမမွေးပေးပေမဲ့ လူမှုရေးချောမွေ့လည်ပတ်စေရေးအတွက် အဖက်ဖက်ကနေပံ့ပိုးကြတဲ့သူတွေလည်းဖြစ်ကြတယ် ဒီ social reproductive labor ကိုများသောအားဖြင့်လည်း မိန်းမတွေက ဆက်လက်လုပ်ကိုင်ကြရတာများပါတယ် ဒါပေမဲ့ မိန်းမမဟုတ်တဲ့သူတွေလည်း ဒီနေရာမှာ ဒီတာဝန်တွေယူထားရတာတွေလည်းရှိနိူင်ပါတယ်
ဒါမှမဟုတ် အခြားသောမိန်းမတစ်ယောက်၊ လူညို၊ လူမည်းကလေးထိန်း/နို့ထိန်းမိန်းမတစ်ယောက် ကိုလိုနီလူဖြူမိန်းမတစ်ယောက်ရဲ့ကလေးတွေကိုပြုစုပျိုးထောင်ပေးရတာမျိုးပေါ့ ဒီဥပမာတွေက ကိုလိုနီခေတ်ကစခဲ့ပေမဲ့ ခုချိန်ထိ girlboss movement ထွန်းကားလာတဲ့လူဖြူနိူင်ငံတွေနဲ့ အီလစ်လူတန်းစားတွေမှာ ဆက်လက်တွေ့မြင်နေရသေးတုန်းပါပဲ လူဖြူမိန်းမတွေက သူတို့ရဲ့ captive maternal ကဏ္ဍဖြစ်တဲ့ သားမွေးမှုကိုလုပ်မယ်၊ ဒါပေမဲ့ မွေးပြီးနောက် ဒီကလေးကို လူတစ်လုံးသူတစ်လုံးဖြစ်လာအောင် ပြုစုပျိုးထောင်ပေးတဲ့ captive maternal တွေကတော့ လူမည်း၊ လူညို (သို့) လက်လုပ်လက်စားလူတန်းစားမိန်းမတွေဖြစ်နေကြမယ်
James ကတော့ captive maternal တွေကို အမေရိကန်ရဲ့ကျွန်ပြုခြင်းသမိုင်းကြောင်းနဲ့ လက်ရှိအမေရိကန်စစ်တပ်စနစ်နဲ့ချိတ်ဆက်ပြီး သီအိုရီထုတ်ထားပါတယ် အမေရိကန်လူမည်းကျွန်ပြုခြင်းစနစ်မှာဆိုရင်ရော captive ဆိုတဲ့ capture ဖမ်းဆီးချုပ်နှောင်ခံရတယ်ဆိုတဲ့စကားလုံးဟာ အင်္လကာသာသာတောင်မဟုတ်ပါဘူး ကျွန်အနေနဲ့ဖမ်းဆီးချုပ်နှောင်ခံထားရတဲ့လူမည်းမိန်းမတွေရဲ့ အိမ်မှုကိစ္စဗာဟီရတွေတင်သာမက လူဖြူသခင်/သခင်မတွေအတွက် လူမှုပြန်လည်ထုတ်လုပ်ရေးလုပ်အားတွေတင်သာမက ရံဖန်ရံခါ လူဖြူသခင်ရဲ့မုဒိမ်းကျင့်ခြင်းကိုခံရပြီး ကလေးလွယ်မွေးရတဲ့ reproductive လုပ်အားကိုပါအတင်းအဓ္ဓမလုပ်ကိုင်ကြရတဲ့ ရုပ်ဝတ္တုပိုင်းဆိုင်ရာကိုယ်နှိုက်ကိုက ဖမ်းဆီးချုပ်နှောင်ခံထားရတဲ့ မိခင်ဖြစ်တည်မှုကို James ကထောက်ပြတာပါပဲ စိတ်ဝင်စားရင်တော့ James ရဲ့စာတမ်းကိုဖတ်ကြည့်ပါ
မိန်းမလို့ယူဆခံရရင်ကိုပဲ မိန်းမတစ်ယောက်ရဲ့လူမှုလုပ်ငန်းစဉ်နဲ့ဖြစ်တည်ရခြင်းအကြောင်းရင်းကို သားမွေးခြင်းတစ်ခုတည်းနဲ့ပဲဖမ်းဆီးချုပ်နှောင်ခံထားရနေသေးတာကို မနှစ်မြို့မိဘူး တကယ်လို့ ကျွန်မက သားအိမ်နဲ့မွေးလာပေမဲ့ ၂၀၂၄ ခုနှစ် အိုလံပစ်မှာ ဟိုးလေးတကျော်ကျော်ဖြစ်သွားတဲ့ Imane Khelif (အီမန် ခါလစ်ဖ်) ရဲ့ ဂျန်ဒါဖြစ်တည်မှုကို ဝိုင်းဝန်းဝေဖန်ကြသလိုမျိုး မိန်းမလို့အများက ကျွန်မကိုမမြင်ဘူးဆိုရင်ရော ဘယ်လိုလုပ်ကြမလဲ? မိန်းမဆိုပေမဲ့၊ တကယ်တမ်းလည်း အကြောင်းအမျိုးမျိုးကြောင့် ကလေးလိုချင်ပေမဲ့ အကြောင်းအမျိုးမျိုးကြောင့် ကလေးမရနိူင်တဲ့၊ မြုံနေတဲ့ (မိန်းမတစ်ယောက်မြုံနေတာဟာ ဘာလို့သူ့ကိုဆဲဆိုရှုံ့ချတဲ့စကားအနေနဲ့ ဥပမာ “အမြုံမ” လို့သုံးရတာလဲ?) အင်မတန်မှသေးငယ်နှုတ်စိတ်လှတဲ့သတ္တဝါတစ်ကောင်ဖြစ်တဲ့ကျွန်မနဲ့ယှဉ်လိုက်ရင် အင်မတန်မှကြီးမားကျယ်ပြန့်နက်ရှိုင်းလှတဲ့စကြဝဠာအဏ္ဏဝါကမ္ဘာလောကကြီးထဲမှာ ကျွန်မ DNA တစ်စိတ်တစ်ပိုင်းပါဝင်နေတဲ့ နောက်ထပ်လူသားတစ်ယောက်ကို ချန်ထားခဲ့ဖို့ဆိုတာ ကျွန်မရဲ့အိမ်မက်တစ်ခုမဟုတ်ပါဘူး အရင်းရှင်စနစ်နဲ့ခေတ်မှာ မိန်းမဆိုတဲ့ပညတ်ချက်နဲ့မွေးဖွားကြီးပြင်းလာခဲ့ရသူတစ်ဦးအနေနဲ့ ကျွန်မဟာလည်း captive maternal တစ်ဦးပါပဲ ကျွန်မသားအိမ်ကနေသာ သားမမွေးခဲ့ရင်သာနေမယ်၊ အခြားသောနည်းလမ်းတွေနဲ့ ပြုစုစောင့်ရှောက်မှုလုပ်အားစက်ဝိုင်းထဲမှာ အလိုမတူလည်း ပါဝင်လည်ပတ်နေရတဲ့သူတစ်ယောက်ပါပဲ အချုပ်ထဲမှာမွေးတဲ့ကလေးလို ဒီလိုဖမ်းဆီးချုပ်နှောင်ခံထားရပြီးသားဖြစ်တဲ့မိန်းမတစ်ယောက်အနေနဲ့ ထပ်ခါထပ်ခါ စဉ်ဆက်မျိုးဆက်ဆက်လက်ဖမ်းဆီးချုပ်နှောင်ခြင်းမခံစေချင်လို့ ဘယ်သောအခါကမှသားမွေးချင်စိတ်ဆန္ဒမရှိတဲ့၊ ရိုင်းစိုင်းတဲ့မိန်းမပဲဆိုဆို မိခင်စိတ်လားလားမျှမရှိတဲ့၊ သားမွေးဖို့လည်း ကျွန်မဇီဝဗေဒကိုယ်ခန္ဓာကြီးကိုယ်နှိုက်ကိုက လက်မြှောက်လက်လျှော့လိုက်ပြီဖြစ်တဲ့ ကျွန်မကို လမ်းမှာများ နောက်တစ်ခါကြုံရင် ကလေးဘယ်တော့မွေးမှာလဲ၊ ကလေးမယူသေးဘူးလားလို့များ မမေးလိုက်စမ်းပါနဲ့တော့လေ မတတ်သာလွန်းလွန်းလို့ မေးဖြစ်မယ်ဆိုရင်လည်း “ကျွန်မ အမြုံမကြီးပါ” လို့ပြန်ဖြေရုံကလွဲလို့ ဒီထက်ပိုပြီး ကျွန်မလည်းမစွမ်းသာလှပါဘူးလေ
ပုံ – အခကြေးငွေဖြင့် ကုသိုလ်ဖြစ်လူဝယ်ယူအလွှတ်ခံရရန် စောင့်ဆိုင်းနေကြသော လှောင်အိမ်ထဲမှဇီးကွက်များ
အမေရိကန် National Library of Medicine မှထုတ်ပြန်သော PCOS ဆိုင်ရာသုတေသနဆောင်းပါး
https://www.ncbi.nlm.nih.gov/pmc/articles/PMC7879843/?fbclid=IwY2xjawFEQmdleHRuA2FlbQIxMAABHbd00VFeXRAiCh63H8xKHN2VJ-Udmi9EN4dDVuFsiW8yvl6aXzTqfh_SWQ_aem_3pD-dN4YAaytQIAm-ftnxA#:~:text=Today%2C%201%20in%20every%2010,prevalence%20of%20PCOS%20were%20rare
Center for Disease Control မှထုတ်ပြန်သော PCOS အကြောင်း
https://www.cdc.gov/diabetes/risk-factors/pcos-polycystic-ovary-syndrome.html?fbclid=IwY2xjawFEQmxleHRuA2FlbQIxMAABHSCIsEf2gTQY1M3a1PjzOdCNLxzscJ3gmERg920CA6I51HegXwnDzYn9qA_aem_m5sDIDVcryvIdQZJUfk_Xg#:~:text=About%20PCOS%20and%20diabetes&text=PCOS%20can%20cause%20irregular%20menstruation,many%20as%205%20million%20people
၂၀၂၄ အိုလံပစ် boxing အားကစားသမား Imane Khelif မှ ဂျန်ဒါအကြမ်းဖက်မှုမလုပ်ရန်တောင်းဆိုခြင်းသတင်း
https://www-nbcnews-com.cdn.ampproject.org/v/s/www.nbcnews.com/news/amp/rcna165169?amp_gsa=1&_js_v=a9&usqp=mq331AQIUAKwASCAAgM%3D&fbclid=IwY2xjawFEQnBleHRuA2FlbQIxMAABHW6j7vTp976OUlORDtsFm5P_B__rBDWg69xOvlZUwmgGp-1FKfJUxVzbOQ_aem_o1Gu1bx5dCExuNCNWEF-aA#amp_tf=From%20%251%24s&aoh=17253760867152&referrer=https%3A%2F%2Fwww.google.com&share=https%3A%2F%2Fwww.nbcnews.com%2Fnbc-out%2Fout-news%2Folympic-boxer-gender-imane-khelif-algeria-bullying-rcna165169
Joy James ၏ ၂၀၁၆ ခုနှစ်ထုတ် The Womb of Western Theory: Trauma, Time Theft, and Capital Maternal စာတမ်း pdf
https://sites.williams.edu/jjames/files/2019/05/WombofWesternTheory2016.pdf
ဖြိုးသီဟရဲ့ The Voice Weekly တွင် ၂၀၁၉ ခုနှစ်တွင် ထုတ်ဝေခဲ့သော “မိခင်ဘဝကို ပရော်ဖက်ရှင်နယ်ကျကျ ဖြတ်သန်းပါ” ဆောင်းပါး
https://www.facebook.com/share/p/1JpKZLCfvs8GFGpx/?mibextid=oFDknk
